Pounamu Te reo Māori edition

E rima tekau tau ki muri, ka puta mai a ‘Pounamu Pounamu’ hei kai mā te ao pānui reo Pākehā. Ko te whakataunga a ngā mana mātauranga o Aotearoa o taua wā, he pukapuka tēnei mā ngā tamariki i ngā kura o te motu whānui. Kua huri te ao, kua hipa te wā, ko tēnei a ‘Pounamu Pounamu’ e horahia nei hei hākari mā te kaipānui reo Māori, ko ia rā pea te mokopuna a te kaipānui reo Pākehā o mua. Ka pēhea te kawe i te wairua o tēnei kohinga kōrero e rangiwhāwhā nei te pānuitia, kia rangona tonutia ai te kounga o te kupu Pākehā? Me kawe tonu i te pukuhohe o He Kēmu Kāri, i te ngau mamae o Tangi, i te hōhonu o te aroha o Te Tamaiti. Kua whakautua taua karanga e ngā kaiwhakawhiti reo Māori tekau mā tahi i noho rā hei pia i Te Panekiretanga o te Reo me ngā Kura Reo. He mea hōmiromiro ā rātou whakamāoritanga e te kāhui hihira, e Mākoha Gardiner rātou ko Pānia Papa, ko Hēni Jacob, ko Stephanie Tibble. Kei roto nei ngā hua o tā ngā kāhui nei whakaheke tōtā, e kitea ai, e rangona ai hoki te puāwaitanga o te reo Māori me ngā reo ā-iwi i roto i ngā tau. Kei te tū rangatira tonu ngā kupu i rere mai ai i te pene a Witi Ihimaera, nāna te huarahi i para hei whai mā te kaituhi kaupapa Māori. Me mihi, ka tika. Ko Kotahi Rau Pukapuka te waka. Ko te pae tawhiti, kia 100 ngā pukapuka reo Māori ka pae ki uta. Ko te whāinga, kia puāwai te aroha ki te reo mā te rau pukapuka. Tēnei mātou e pōhiri ana i a Penguin Random House hei hoa whakatere, hei hoa whakatutuki i ngā wawata o te hunga e ngākaunui ana ki te reo Māori.